अलिबाग - महाड तालुक्यातील तळीये येथील दरड कोसळल्यामुळे बाधित झालेल्या 12 कुटुंबांना तात्पुरत्या निवासाकरिता आमदार भरत गोगावले यांच्या हस्ते कंटेनर सुपूर्द करण्यात आले.हे कंटेनर मिळण्यासाठी तत्कालीन जिल्हाधिकारी निधी चौधरी व विद्यमान जिल्हाधिकारी डॉ. महेंद्र कल्याणकर यांच्या प्रयत्नातून नार्डेको कंपनी व मुंबईतील बिल्डर असोसिएशनमार्फत पुरविण्यात आले आहेत.
या कंटेनरमध्ये किचन प्लॅटफॉर्म, टेबल व शौचालयाची सुविधा देण्यात आली आहे. येथे पाणीपुरवठा व कंटेनर उभे करण्यासाठी प्लॅटफॅार्म बनविण्याचे काम जिल्हा परिषद बांधकाम व पाणीपुरवठा विभागामार्फत करण्यात आले.हे तात्पुरते कंटेनर सुगंधचंद पोखरमल अग्रवाल यांनी तर योगीराज त्रिंबक चौधरी, सुंदराबाई भगवती माने, लक्ष्माबाई पांडुरंग माने, कृष्णाबाई गणपत पांडे या जमीन मालकांनी विनामूल्य जमीन उपलब्ध करून दिली आहे. उर्वरित 12 कंटेनर लवकरात लवकर प्राप्त करून घेण्याचे कामही प्रगतीपथावर आहे.यावेळी जिल्हा परिषद सदस्य मनोज काळिजकर, पंचायत समिती सभापती सपना मालुसरे, तहसिलदार सुरेश काशीद, सरपंच संपत तांदळेकर, उपसरपंच महेंद्र म्हस्के, मंडळ अधिकारी जी.जी.पवार, तलाठी जगदिश शिंदे, ग्रामसेवक प्रविण शिंदे व तळीये ग्रामस्थ उपस्थित होते.
%20-%20Copy.jpeg)
